टिलपिल आँखामा शवको प्रतीक्षा

काठमाडौं - पर्वतारोही सोना शेर्पा विश्वको नवौं अग्लो शिखर सफल आरोहण गरेर फर्किने प्रतीक्षामा थियो उनको परिवार। त्यो प्रतीक्षा सोनाको परिवारका लागि कल्पनामात्रै रह्यो जब उत्तरी पाकिस्तानमा तालिबान लडाकुद्वारा ३६ वर्षे हिमाली पथप्रदर्शक शेर्पाको हत्या भएको समाचार आयो।


यतिबेला सोनाको शोकाकुल परिवार इस्लामाबादबाट कहिले शव आउने हो? कुरिरहेको छ। सफल आरोहणको प्रतीक्षा अहिले शवको प्रतीक्षामा बदलिएको छ। नागा पर्वतको आधारशिविरबाट सोनाले अन्तिमपटक शुक्रबार परिवारका सदस्यहरुसँग टेलिफोन सम्पर्क गरेका थिए।
'आरोहण सकिनेबित्तिकै ढिला नगरी घर आउँछु भनेको थियो,' आँखाभरि आँसु पार्दै ७० वर्षे आमा फुर्छिकीले भनिन्। उत्तरी पाकिस्तानमा तालिबान समूहले आक्रमण गर्दा शेर्पासहित ११ जना निहत्थाको हत्या गरेको थियो। तालिबान बन्दुकधारीले आधारशिविरको पालभित्र प्रवेश गरी शेर्पासहित युक्रेनी, चिनियाँ र पाकिस्तान नागरिकको गोली हानी हत्या गरेका थिए।
परिवारको पालनपोषण गर्ने एउटै सदस्य सोनाको हत्यापछि उनकी २८ वर्षे पत्नी डोल्मालाई ८ वर्षीया पेमा रिन्जी र १९ महिनाको पेमा दोर्जी छोराहरूको भविष्य के हुन्छ भन्ने चिन्ताले सताएको छ।
'मेरो जीवन अब, कता जान्छ केही थाहा छैन। दुई छोरा साना छन्। छोराहरुलाई राम्रो शिक्षा कसरी गर्ने हो,' सुन्निएका आँखामा गला अवरुद्ध पार्दै उनले भनिन्। राम्रो शिक्षा दिन नसके सन्तानको भविष्य छैन भन्ने उनलाई थाहा छ।
नातेदार तथा शुभेच्छुकले भरिएको भान्सासँगै जोडिएको सानो कोठामा शोकाकूल बनेकी डोल्माले भनिन्, 'यो घटना सपनाजस्तै लागेको छ। उनको मृत्यु भयो भन्ने विश्वासै लागेको छैन।'
शोकमा डुबेकी फुर्छिकीले भगवानसँग प्रार्थना गर्दै भनिन्, 'मेरो छोरालाई आतंककारीले मारेको सुनेको छु, तर मेरो छोरा नेता होइन। हिमाल चढ्नेहरूको सहयोगीमात्रै हो।'
ट्रेकिङ व्यवसायमा संलग्न भाइ छिरिङ शेर्पाले शारीरिक रूपमा बलिया सोना निकै सहयोगी, सरल स्वभावले मृत्युँसँग पुर्‍याएको ठान्छन्।
गत महिना अमेरिकी सेनाले गरेको कारबाहीमा तालिबानका दोस्रो तहका नेता वलिउर रेहमान हत्याको प्रतिशोध साध्न त्यो आक्रमण गरेको बताइएको छ।
'मेरो दाइको हत्या कुनै राजनीतिक कारणले भएको होइन,' छिरिङले दाइ सोनालाई सम्झँदै भने।
सगरमाथाको सफल आरोहण गरेको चिनियाँ आरोहण टोलीसँगै गएका सोनालाई उनीहरुकै आग्रहमा नागा पर्वतको आरोहणमा संलग्न गएका थिए। चिनियाँ टोलीको आग्रहलाई अस्वीकार नगरी सोना जेठ २७ गते त्यसतर्फ गएका थिए।
'दाइले भारतबाट फोन गर्दा व्यस्त भएको कारण मैले कुरा गर्न पाइनँ,' उनले भने। परिवारका सदस्यका अनुसार सोनाले तीनपटक सगरमाथाको सफलतापूर्वक आरोहण गरेका थिए। उनले कोरियाली टोलीसँग पहिलोपटक मकालु र नागा पर्वतको सन् २००९ मा सफल आरोहण गरेका थिए।
शनिबारबाट सोनाका समूहले ८ हजार १ सय २६ मिटर अग्लो नागा पर्वतको आरोहण सुरु गर्दै थियो। आरोहणको समायोजन तथा व्यवस्थापन गरेकोे सेभेन समिट ट्रेकिङका प्रमुख मिङमार शेर्पाले भने।
यसैबीच, नेपालका लागि पाकिस्तानका लागि नेपाली राजदूत भरतराज पौडेेलले सोमबारसम्म सोनाको शव नेपाल पठाउने तयारी भएको बताए। 'हामी विदेश तथा गृह मन्त्रालयका सहयोगमा अहिले आवश्यक प्रशासनिक कार्य पूरा गर्न व्यस्त छौं,' उनले भने।