मैले गर्भपतन गर्न मिल्छ कि मिल्दैन ?

म २० वर्षकी विवाहित गृहिणी हुँ। मेरो महिनावारी रोकिएको २ महिना भयो, पिसाब परीक्षण गर्दा गर्भ रहेको थाहा भयो, तर मलाई गर्भ चाहिएको छैन। मैले गर्भपतन गर्न मिल्छ कि मिल्दैन ? औषधिले पनि गर्भपतन गर्न सकिने कुरा कतिको भरपर्दो हो ? 

१६ वर्ष पार गरिसकेकी महिलाले आफ्नो मञ्जुरीमा १२ साता अर्थात् करिब ३ महिनाको गर्भ गर्भपतन सेवाका लागि सूचीकृत गरिएको संस्थामा जानुपर्छ। नेपालमा एमभिए अर्थात् प्लास्टिकको क्यानुलाको मद्दतले पाठेघर सफा गर्ने वा औषधिको प्रयोग गरेर गर्भपतन गर्न सकिन्छ। ९ साता अर्थात् ६३ दिनसम्मको गर्भपतन औषधिले पनि गर्न सकिन्छ, तर सूचीकृत स्वास्थ्य संस्थामा गएर आवश्यक परामर्श तथा जानकारी लिएर पूर्ण परीक्षण गरेर मात्र यस्ता औषधि प्रयोग गर्नुपर्छ। हतारमा, औषधि विक्रेताको बहकावमा  वा अन्य कुनै अवस्थामा बिना पूर्ण परीक्षण औषधि प्रयोग गर्नु निकै खतरनाक साबित हुन सक्छ। बिना परीक्षण गर्भपतनको औषधि सेवन गर्दा अत्यधिक रक्तश्राव हुने, गर्भपतन नहुने मात्र होइन ज्यानै पनि जान सक्छ। गर्भपतन गर्न पाउने कानुनी अधिकार भएकाले लुकेर, हतार गरेर जोखिम लिनुभन्दा पनि सुरक्षित गर्भपतन रोज्नुपर्छ।