एक हप्तामै रणवीरको सिनेमाले कमायो १०८ करोड, खानहरुलाई चुनौती

बलिउड नायक रणवीर कपुर ले अभिनय गरेको चलचित्रलेे एकपछि अर्को सफलता हाशिल गर्न थालेको छ । चलचित्र ‘बर्फी’ र ‘रकस्टार’बाट एकाएक चर्चामा पुगेका रणवीर अहिले बलिउडका तिन खानलाई नै चुनौती दिने भएका छन् ।रणवीर कपुर र दीपिका पादुकोणले अभिनय गरेको चलचित्र ‘ए जवानी हे दिवानी’ले एक सातामै १०८ करोडको व्यापार गरेर तहल्का मच्चाएको छ । यो चलचित्र भारतका ३ हजार हलमा प्रदर्शनमा आएको थियो । बलिउड नायक सलमान खानले अभिनय गरेको चलचित्र ‘एक था टाइगर’को केही रेकर्ड पनि यसले ब्रेक गरेको छ । इदको अवसरमा ३५०० हलमा प्रदर्शनमा आएको ‘एक था टाइगर’लाई नै ‘ए जवानी हे दिवानी’ले चुनौती दिएको छ । सलमानको यो चलचित्रले तिन दिनमा ५९ करोडको व्यापार गरेको थियो । तर रणविरको ‘ए जवानी हे दिवानी’ले भने तिन दिनमा ६२ करोडको व्यापार गरेको छ ।

३००० हलमा चलेको ‘ए जवानी हे दिवानी’ले ६ दिनमा ९८ करोडको व्यापार गरेको छ भने सलमानको ‘ए था टाइगर’ले बिदाको समयमा ३५०० हलमा चलेर १ सय करोड कमाएको थियो । रणवीर अभिनित ‘ए जवानी हे दिवानी’ बिदाको अबसरमा प्रदर्शनमा आएको चलचित्र होइन । यस्तै ओभरसिजमा यो चलचित्रले बिहिबार सम्म ३७ करोडको व्यापार गरिसकेको छ ।

एक सातामै १ सय करोडको क्लबमा समावेश भएपछि अहिले रणवीर र दीपिकाको चर्चा चुलिएको छ । नायिका पादुकोणले अभिनय गरेको २ चलचित्रले यो बर्ष १ सय करोडको क्लबमा आफूलाई उभ्याइसकेका छन् । यसअघि जनवरीमा प्रदर्शनमा आएको ‘रेश २’ ले १०४ करोडको व्यापार गरेको थियो । निरन्तर सिनेमा सफल दिएपछि रणविर कपुरलाई बलिउडका तिन खानसँग तुलना गर्न थालिएको छ । बलिउडमा साहरुख खान, सलमान खान र आमिर खानले बक्स अफिसमा कब्जा जमाउँदै आएका छन् ।